U cosu di Carulu

U cosu di Carulu

    Ogni volta ch’eddu ghjucava à u ballò cù l’amichi, avia i granchi Carulu.  Dicia cù a so dicitura manerancia :  « Oh amicaccii, ùn ne possu più, mi ne morgu… » o « Saranu pussibli issi granchi, cumu face James Bond, mai hè tuccatu ! » o ancu « AHHHHHHH », rutulendusi in tarra. Sò strani i so granchi, ch’eddu ci dice sempri « Eiu, sò un tennisman, sò instancabili ! », o « Facciu cum’è Sarkozy, parechji jogging à sittimana. » Bon.

    Ma dapoi calchì ghjornu, u so cumpurtamentu hè stranu… À principiu di a partita, apre a so buttiglia d’acqua « bio », biota, ch’ùn ci hè cà aria nentru. Quand’eddu l’apre, mette u so nasoni vicinu à a buttiglia, ne caccia subitu u tappu, respira un culponi, è richjude subitu a buttiglia. Noi, ùn capimu nudda. È Nasoni ricummencia mentri a partita, parechji volti. Li dumandu dunqua cosa si passa, è mi risponde :

    «  Ùn hè nudda o Cazzu Marì ! Mi parmitte di francammi da i granchi, guarda ! Mi ne sò cuddatu à u monti Rinosu cù a me buttiglia, è l’aghju riempiuta d’aria muntagnolu. Sai, l’aria muntagnolu hè bonu pà u spurtivu. Hè bonu pà u sangui. Hè pà quessu chì Roger Federer hè u più forti, ùn hè mai stancu ch’eddu s’appronta ind’i so muntagni. »

    …

    Dupatu.